E non dite che è leghista

Acchiana e scinni ‘u mari e a so’ munnizza torna arrè
un caticeddu e na tappina e na lanna ‘i Red Bull
Sandokan c’un moito e un bigliettu cu l’invitu
Sandokan ca si ‘nsignò a purtari l’infradito

Genti ca veni a’ mari sulu pi diri ca vinni ccà
c’un gettoni du bigliardu ‘u cavaddu si movi un pocu ‘u culu
puzza di pisci frittu e di pizza nno cartuni
Kammamuri havi sissant’anni ca s’annaca ca pinsioni…

YANEZ DE GOMERA cci pensi com’era?
ora bicicletta e vuvuzela e havi ‘u Suzuki Tremal Naik
YANEZ DE GOMERA ti ricordi di James Brook
joca e’ carti o’ stabilimentu Riviera e dicinu ch’è sempri mmriacu.

Stuzzichini, moscardini e una bibita di quattru culuri
Abbronzati, tatuati su’ pirati chi vennu di Varesi
La pantera, gonna nera, canottiera, cameriera
S’annaca ‘u culu puru senza gettoni e dumanna si canci biccheri

Sandokan nta spiaggia chi mutanni Billabong
Havi l’artrosi e ‘u riportino, parti pi Mompracem cu pedalò
E i Dayaki c’a Gazzetta ‘unn’hannu tempu pi tagghiariti ‘u coddu
lassanu la spada sutta l’ombrelloni e fannu cchiù dannu cu l’ I Phone

YANEZ DE GOMERA ha virsti l’atra sira?
‘nveci di la Perla de Labuan, Marianna ora pari na pitruzza
YANEZ DE GOMERA cuntanillu arreri com’era
vitti ca si rifici li minni, lu cori no, ‘un si potti rifari

La sirena si ncazzò c’on po’ jucari o’ palluni
Pulenta e cuba libre pi granci ‘n pruc’ssioni
Cumincia l’eppi auar, la tigre di malesia
Finisci a la taverna a risu mmiancu e magnesia
Ustionati, pirati senza prutizioni,
barracuda chi Ray Ban chi jocanu a ping pong
Sandokan ‘jecca vuci ‘n pizzeria…grida e canta Romagna Mia…

YANEZ DE GOMERA cci pensi com’era?
ora bicicletta e vuvuzela e havi ‘u Suzuki Tremal Naik
YANEZ DE GOMERA ti ricordi ‘u colonnello Fitzgerald?
lu vitti supra un pullman che java a Rimini a viriri i delfini...